Hosea 8
Te Israel dabego tibo godiba lotu obaso, tama Genuai Bidigo augwali po tų ilali
1Genuai Bidigo enabolo te po wai,“Te boi hwįmainu biugel bu wao,” wali.
“Te boi bidi dabe polo aselama,
te eno tǫba hwįagasaibao,
te ba kemodage polo te tǫba bola dulama,
te hasa bolo ela sigulubo tiwai yaibao.
Magi baso meni.
Eno te ena we bidi dabe dali
dąų walali po te augwaligo togolama,
te bolama, tama augwaligo eno
bomai po sela sąwani.
2Augwaligo te po wabo dao,
‘Nage dago God da, da Israel dabe,
tama dago nage koneai da,’ obao.
3Tiali goli, menio.
Augwaligo te wiegi yai doloba pai kolesaga tagalubaso,
te boi bidi dabego augwali pobeasa bilaibao,” wai.
4“Eno we bidi augwa digi augwa
dolaluaibao homu eyu,
augwa king bidi dali polaluabo
tobolu bidi dali nigilibao,
tibaso eno augwaliba usu da homu ebeo.
Augwaligo te tibo god te augwa silva me golgo nigali.
Tibaso, eno te we bidi augwali dolaibao,” wai.
5“Eno te bulmakau gol te Samaria dabego
nigali te lotu wabo eno hagela mu yai.
Eno wado po dwai mu augwaliba wali.
Eno homu augwa te dwai kolesaga
polo tagalomainu yai.
Tiali goli, te me tebeo.
6Te Israel sę bidi me deligo te tibo god nigali.
Te God meni, te olo piksa noma naga dao.
Eno te bulmakau piksa noma alua sąnama,
te pobele bage kakali pedelaibao,” wai.
7“Augwaligo ebo dwai kolesaga te dwasianu naga dao,
te dwasianu wali asobo tiwai naga dao,
augwaligo te homu ebo dao.
Tiali goli, nosali te kolesaga ebode augwali dolaibao,
te pobegebo wali genuaigo
te bidi dolobo tiwai yaibao.
Tama augwali te wit gide te nai walisąbo tiwai eyu,
tama te bret nigabo wit meni yani.
Tialima, te dwai witgo nai me pedai badu
waligi sogo da, tagalao,
te gasa badu tǫ kantri bidi dabego
naga tuagasigi da,” wai dao.
8“Te Israel dabe te wiegi yai mu me isąwai.
Te gasa tǫ kantri dabego augwali dalali tiwai elama,
tama te Israel dabe te bage tiwai pedalali.
Megi da, augwali te olo nai me deli tiwai elama,
tama augwaligo te eno sę yainu ebaso,
usu me egobeo.
9Augwaligo hagoma te bulu uni yowigo
ebo hagoma tiwai yali,
tama augwa homu kolesaga wali pai.
Te augwali pelama,
te Asiria dabego augwali tau somainu hanalugi pai,
tama augwaligo te mone tolama,
te gasa tǫ kantri king homu begelama,
augwali tau somainu yai.
10Tialima, megi da, augwali
te gasa kantri dabe tiwai pedalali goli,
te augwali dali eno deliba sisinama,
te dwai dene mawaibao,” wai.
“Tamadi tama te Asiria kingo augwali
aiyaba mu elaluama,
te dwai genuai sęgę augwaliba muaibao,” wai dao.
11“Te Israel dabego te augwa
dwai sę yali sęgę sela sąyabo alta hauwa nigali,
tialima te yali ofa dolo me isąwai,
tama tiyu augwaligo te dwai sę hauwa yalio.
12Eno augwalibolo te eno bomo yai po hauwa asęani.
Tiali goli, augwaligo te bomo yai po suali,
te gasa hanigo ebo tobage kolesaga naga yali,
te augwaligo ena wali me asobeo,” wai.
13“Augwaligo te ofa hauwa eyu,
te ofa ebo mi tubo dao.
Tialima ena, Genuai Bidi,
eno augwaliba te wiegi yai homu pemene me ebeo.
Tibaso, megi da, eno augwa yali dwai sęde
homu kone palama,
te dene mawaibao,” wali.
“Te eno augwali Isipba ma kalabus
igi pomainu tagala palaibao,” wai.
14“Te Israel dabego homugo te kingo
bomogo augwali tau sabo usu yaiba homu yai,
tama tiyu augwaligo te kingo bomai be sę yani.
Tiali goli, augwaligo te naide homu kone isąwai,
ena God, eno te we bidi nigai dao.
Tama te Juda dabego me te dwai sę yai elaluali,
magi baso meni, augwa taun dabe
bagulabo te bomai obo dabe nigali,
tama augwa homugo te augwali
bugagia bidaiba homu yai.
Tiali goli, tagalao, eno sia te taunba tula palama,
te kingo be dabe dali siago dela silimainu yaibao,”
Genuai Bidigo enabolo te po wai.
Copyright information for
MPS